Nuffnang X SPCA [維護動物權益Blogger運動]
目的地係上水香港犬隻工作及障礙賽事會
大家就先乘坐由大會安排嘅專車
一落車就見到一大片草地喇
個度仲有各式各樣訓練狗狗嘅工具
嘩,呢個勁呀,要左右左右咁穿插咁行架
哎呀~阿Don黎唔到玩真係嘥哂喇
冇法啦~蝦子餅又話唔去,得我一個攪唔掂佢架
整到佢識唔到新朋友添~哈哈
個日愛協都係協辦單位之一
在場亦放咗好多寵物玩具,T-shirt,雨傘,記事簿等等
我就揀左一張毛毯,天氣還凍嘛,買返去比屋企個三隻化骨龍都好
其實我成日都見到SPCA響周圍都設有咁樣嘅counter
大家行開見到啱嘅都可以幫助一下啊~
之後就由愛協代表Tony 講解一下有關虐畜嘅定義
講了一些有關虐畜嘅Case 俾我哋知道
仲簡單咁解釋下其實SPCA 呢個組織嘅歷史,運作,工作範疇等
原來我一直被外間嘅流言而誤解左一樣好重要嘅嘢
就係我當初深信愛協係會無目的咁令好多流浪貓狗安樂死
但原來唔係,Tony解釋說被領養走嘅動物比例遠遠超過要安樂死的
我聽到好開心啊~証明而家好大部份人都好有愛心,識得去領養動物
Tony 當日亦帶埋佢隻愛狗yogurt 添
yogurt 係一隻好可愛嘅金毛尋回犬,好識”dei”人,好喜歡玩
一見到嘢食就特別興奮呢!
但原來佢係同佢主人Tony一樣食素架,好一對健康嘅父女呢~
最後就係自由活動時間喇
大會仲安排咗一個燒烤大會俾我地添
水魚個女茶茶呀,之前我唔識死
一開頭上專車時見到佢就想摸,跟住換嚟佢發我惡呀
嗚嗚嗚….你唔好唔鐘意我啦~我都係養莎莎架喎!
當日見到好多貴婦…直頭係貴婦同樂日呀
佢哋真係好可愛呀
呢隻狗狗勁喇~個度每樣訓練工具佢都可以玩到
原來佢代表香港出賽架,唔怪之得啦~比十個叻你
臨走時發現有個好大嘅泳池可以比狗狗游下水
唔知如果我掉我家小狗落水佢會點呢~嘻
就係咁,燒吓嘢食,講吓寵物經,同狗狗玩吓
好快又過咗一個開心嘅下午喇
多謝大會及贊助商送給我們的禮品包
家中小貓MoonMoon一見到張毯就已經跳左上去瞓喇
============================================
其實花花每次看到一D有關虐待動物嘅報導
甚至知道較早前有人將自己虐待動物嘅片段放上網
我都覺得好心痛,有時眼淺嘅我就連純看文字都睇到眼濕濕
一方面當然替那些被虐待嘅動物難過
但另一方面就好忟個D虐待動物嘅人
點解你哋唔諗下如果掉返轉人地咁對你,你哋會好受嗎?
定係你哋無知到以為動物係冇感覺嗎?
我真係唔明白佢哋係咩心態
只對佢哋咁嘅行為覺得好可恥,可悲…
雖然政府有法律去懲罰呢D人
講緊嘅只係一經定罪,最高罰款$200,000及監禁三年
我自己真係覺得太少喇~
當然,我覺得自己都仲未做到一個一百分嘅主人
但我會盡我嘅能力去愛護佢哋,教導佢哋
我家兩隻小貓0靚仔與MoonMoon及小狗Don我都好鍚佢哋架
仲有呢,我好讚成去領養小動物架
我家的兩隻小貓都係我五年前去愛協領養佢哋返嚟
而小狗我用了半年時間上網搵左佢返嚟
點解上網呢~因為我個人比較特別,我自己其實係唔會响寵物店買寵物
因為我會覺得有D寵物店係冇良心的,而當我又唔識揀邊間寵物店係好嘅時侯
我就選擇了從網上搵一D自家繁殖的人家,當初我搵左好幾個月
亦上去做過家訪,係啊,可以做家訪架~睇過知道那家人並不是盲目繁殖的
所以先決定要..有D人可能會覺得,買隻寵物啫,唔使咁麻煩呀
我就係咁嘅人嚟,就連繁殖者我都要確保係一個好人家,對寵物好嘅主人
我先會下決定買他們家的小狗狗
所以我都好希望大家將對動物好一點呢個信息宣揚開去
可能我哋做到嘅並不多,但當你地睇完又再傳出去
你哋嘅朋友知道之後又傳開去,咁就會令到更加多人知道架喇
我亦好希望將來唔會再聽到或睇到有人虐待動物嘅消息
最後,如果你有將呢篇水蛇春咁長嘅文睇晒嘅話
我好多謝你哋呀~花花無言感激你哋~
請記得: 你有你的工作、你的娛樂、你的朋友，但對牠們而言，你就是唯一
謝謝!
沒有留言:
張貼留言